Batang Mapagmasid

pluma ni Batang Mapagmasid 

Katauhan ay hinahanap

Sa mga titik kong nilingap

Tanaw ay malayo't malawak

Puhunan ay istilong hawak

Datapwat maliit ang ningas

Apo'y ng damdami'y lalakas

Sa pagtahak ng bagong mundo

Pangalan ko ay magbabago

Madla ay sikap nililinlang

Sa layunin ay nahumaling

Bayan nga ay napapaisip

Misteryo nga ba aking lakip?

Prinsipyo ay ipababatid

Mumulat ng isipang ganid

Ibabahagi tangang ilaw

Aalis sa daang mapanglaw

Ikaw ang tanging inspirasyon

Sa pagsuong sa kahulugan

Kaya huwag ka nang mangamba

Ako ang sayo'y magdadala

Ako'y umalis sa pedestal

Upang ikaw ay ikarangal

Lagi sayo ay magmamasid

Susuri hanggang mamukadkad

Di batid itong kakayahan

Kaloob Niya'y aalagaan

Gagamitin sa nararapat

Tatakda ng bagong alamat

Mag-aahon sa bayang lugmok

Babangon sa lipunang mukmok

Maghihilom sa kanyang kanser

Sa pagtatapos ng batsilyer

H'wag mo nang tangkaing hanapin

Pagkatao ko'y 'yong limutin

Ako'y mananatiling buhay

Gamit titik kong nabubuhay

Laging sayo'y may nakatingin

Mga mata ko'y may mithiin

Natatanaw ko ang 'yong bahid

Pagkat ako ay mapagmasid

Be a Fan